Wie der Obba old worn is

Isser hald ofd rumgschdanna

Im Säuschdohl oder so.

Un wos hod die Omma gsechd?

„Wu ma na hieschdelld, schenierder!“

Wenn der Sommer widdä

so droggn wird

Un widdä nix aufn Agger schded

Do derfn sich die Spärng

Fei gnie, die Dunnerkeiler.

Kumm ner hamm, hadsa gschend

Wennä nei Werdschafd is.

Ledsda Wuchn hamsa na nausgadrogn

Un edserd sechd sa:

„Mid die Händ könnd ich na rausgrads!“

Reizwäsche?

Ich waas ned!

Wemmä scho so weid is,

Brauchd mer des

Aa nimmer.

Mein Heiner hasd gheierd

Ka Gäld hasd ned miegabrachd

Kana Möbl aa ned.

Blos Läus un Flöh

Un die warn grang.

Über den Wipfeln ist Ruh

Hoddä gsechd

Dabei worä ner blos froh

Äs sei Alda

Heisä wor.

Zerschd hammsa ned gawölld

Nachä hammsa abgward

Bis die GroGo waggld

Edserd wöllnsa widdä.

Pfeufndeggl!

Wies den Obba so schlechd ganga is

Sämmä auf Ferdsahailichn gawohld.

Gsunga hammä und gabedd aa.

Xund isser nimmer worn.

Aber schö wars!

Wenn die Sunna brennd

Un grod erschd had’s Middooch galäud

Do deng ich an Ahmd

Wenns kühl wird.

Des Bier maan ich.

„Lina, kumm amol rübä.“

„Wos is denn?”

“Dei Mo is gschdurm.“

„Ja!

Erschd wird gassn.“